Бұл туралы Caravan.kz медиа порталы kaz.inform.kz-ке сілтеме жасап хабарлайды.
Ол мұны Оңтүстік Корея парламенті екіжақты сауда келісімін ратификациялау бойынша ішкі процедураларын әлі аяқтамауымен түсіндірді.
-Оңтүстік Корея парламенті АҚШ-пен жасалған келісім шарттарын орындамай отыр. Президент Ли екеуміз 2025 жылдың 30 шілдесінде келісімге келдік және оны 2025 жылдың 29 қазанында Кореяға сапарым кезінде растадық. Неліктен Корея парламенті оны әлі ратификациялаған жоқ?- деп жазды Трамп Truth Social сайтында.
-Оңтүстік Корея парламенті біздің тарихи сауда келісімімізді орындамағандықтан, мен автомобильдерге, ағаш материалдарына, фармацевтикаға және басқа да барлық өзара тарифті 15%-дан 25%-ға дейін көтеріп жатырмын, — деп келтіреді Оңтүстік Кореяның Yonhap ақпарат агенттігі Трамптың сөзін.
Бұл биліктегі Демократиялық партияның қараша айында сауда және инвестициялық келісімді жүзеге асыру үшін Ұлттық жиналысқа енгізген заң жобасына қатысты. Құжат әлі қабылданған жоқ.
Қараша айында жарияланған бірлескен меморандумға сәйкес, келісім Оңтүстік Кореяның АҚШ экономикасына 350 миллиард доллар инвестиция салуын көздеген. Оның орнына Вашингтон Сеулге қарсы жауап тарифтері мен автомобиль баждарын 15%-ға дейін төмендетті.
Құжатқа сондай-ақ Трамп әкімшілігінің Оңтүстік Кореяның ядролық сүңгуір қайықтарды сатып алуын мақұлдауы және азаматтық уранды байыту және пайдаланылған ядролық отынды бейбіт мақсатта қайта өңдеу жоспарын қолдауы кірді.