Үкімет басшысының орынбасары Қ.Көшербаев Батыс Қазақстандағы ірі мал бордақылау кешенінде болды

Аталмыш кешен 2010 жылы пайдалануға берілді. Құны 3,2 млрд. теңгеге бағаланған бұл жобаның нәтижесінде 118 жаңа жұмыс орны ашылды. Мұнда орташа жалақы 55 мың теңге көлемінде. Кешен 118 га аумақты алып жатыр. Кешен құрамажем зауыты, дән қоймасы, қоражай, мал сою және бөлшектеу цехы, қалдықтарды қайта өңдеу, етті сақтауға арналған тоңазытқышты камералар, тағы басқалардан тұрады. Экспортқа өнім шығаруға бағыт ұстаған кешенде мал төлін 8 айдан 15-18 айға дейін жеделдетіп семірту көзделген. Кешен толық қуатына көшкенде, сыртқа 2073 тонна ет өнімдерін жөнелте алады. Басқа өнімдері де жерде қалмайды. 2011 жылы мұнда 806 бас ірі қара сатып алынып, 397 тонна ет өндірілді. Оның 65 тоннасы көршілес Ресейге жөнелтілді. Бөлінген 500 млн. теңге несие қаражаты есебінен кәсіпорында ірі қара малын сатып алу жұмыстары жүргізілуде. Қазір кешенде 1600 бас мал бар, таяуда оның санын 4500 басқа жеткізу жоспарлануда.