Ұлттық комиссияның жұмыс тобы мемлекеттік бюджетті қалыптастыру принциптеріне қатысты жаңаша көзқарас қарастыру жөнінде ұсыныстар енгізді

Бүгін, 24-қаңтарда Астанада Қазақстан президентінің жанындағы азаматтық қоғам және демократияландыру мәселелері жөніндегі ұлттық комиссияның екінші отырысы барысында мемлекеттік басқаруды орталықсыздандыру және жергілікті өзін-өзі басқару жүйесін енгізу жөніндегі жұмыс тобының мүшелері мемлекеттік бюджетті қалыптастыру принциптеріне қатысты жаңаша көзқарас қарастыру жөнінде кейбір ұсыныстар енгізді,- деп хабарлайды KZ-today тілшісі.

«Мемлекеттік бюджет ауылдық және аудандық бюджеттер деңгейінен, басқаша айтқанда төменгі деңгейден бастап қалыптасуы тиіс. Бұл төменгі деңгейдегі бюджеттердің шығыс бөлігін айқындап алғаннан кейін ғана субвенциялар мен аударымдар туралы мәселені шешуге, мемлекеттік бюджет жобасын жасауға осыдан кейін барып кірісуге мүмкіндік береді»,- деді өз сөзінде жұмыс тобының төрайымы Дариға Назарбаева.

Осыған байланысты жұмыс тобының төрайымы топ құрамына ҚР экономика және бюджетті жоспарлау министрі Қайрат Келімбетовты енгізуді өтінді.