Дүниежүзілік көшпенділер ойындарында тұңғыш рет барлық құрлықтың өкілдері бақ сынайды, деп хабарлайды Caravan.kz медиа порталы.
Бұл туралы Орталық коммуникациялық алаңында өткен брифингте айтылды.
Ұйымдастырушылар қазір ауқымды спорттық шараға дайындықты пысықтап жатыр. 8-13 қыркүйек аралығында өтетін Көшпенділер ойындарына шамамен 560 спорттық ат және 45 құс қатысады.
Жалпы жүлде қоры — 250 млн теңге. Дүбірлі додаға 64 елдің бұқаралық ақпарат құралдарының өкілдері қатыспақ.
«Бүгінде спорттық жарыстарға барлығы 89 елден 2430 қатысушы тіркелді. Оның ішінде жаттықтырушылар, спортшылар, мәдени және ғылыми жобаларға қатысатын қатысушыларымыз. Ойындарда 21 спорт түрі бойынша 97 медаль жиынтығы сарапқа салынады. Медальдардың жалпы саны 581 дана», — деді дайындау және өткізу жөніндегі дирекция басшысының орынбасары Абылай Қондыбаев.
Сондай-ақ ол билеттердің құны қанша екенін айтып берді.
«Наурыз айының соңында Көшпенділер ойындары аясындағы жарыстарға билеттер сатыла бастады. Ересектер үшін құны 1 мыңнан 15 мың теңгеге дейін барды. Билеттердің орташа құны 3600 теңгені құрайды. Оқушыларға, зейнеткерлерге және мүмкіндігі шектеулі жандарға жеңілдіктер қарастырылған. Бұл жеңілдіктер тек ойындарға қарастырылған. Екі күн бұрын ашылу салтанатына билеттер сатылып кетті», — деді Абылай Қондыбаев.