Вашингтондағы Қазақстанның мәдениет фестивалі аясында бірқатар іс-шаралар ұйымдастырылды

Вашингтондағы жалғасып отырған Қазақстанның мәдениеті күндері аясында өткен аптада «Қазақстанның музыкалық картасы: Ұлы даланың әндері мен әуендері» атты қазақтың дәстүрлі әуендерінің концерті болып өтті («Musical Map of Kazakhstan: Songs and Tunes of the Great Steppe»).

АҚШ-тағы ҚР елшілігінің баспасөз қызметі хабарлағандай, концерттің басты оқиғасы — американ қауымының Қазақстанның әртүрлі дәстүрлі ойындары мен ұлттық аспаптарымен танысуы болды. Домбыра үні Қазақстанды білетін біраз жұртқа әбден таныс болса, қобыздың қоңыр үні, жетіген, саз-сырнай мен сыбызғыдан шыққан сырлы әуен жиналған қауымды таңғалдырды.

Вашингтондағы Қазақстанның мәдениеті фестивалін Смитсониан мұражайлар жүйесінің бірлесуімен АҚШ-тағы ҚР елшілігі ұйымдастыруда. Фестиваль 2010 жылдың соңына дейін жалғасын табады, ол ҚР Президенті Нұрсұлтан Назарбаевтың биылғы жылы сәуірдің 14-інде Вашингтонға жасаған сапары барысында ашылған болатын.