Биылғы кинофестивальдің Гран-При жүлдесі ешкімге берілмегені жайлы баяндамас бұрын, оның аясында айта қаларлықтай қандай оқиғалар өткенін өрнектеп көрелік.
Оңтүстік астанаға Еуразия кеңістігіндегі соңғы жылы түсірілген ең үздік картиналарды алып келетін аталмыш кинофестиваль қай кезде де әлемге танылған айтулы қонақтарымен қадірлі. Ал биыл қаланың киносүйер қауымы Ресей кинематографиясының қазіргі көрнекті өкілдерінен Нонна Гришаева, Алиса Гребенщикова, Дарья Повереннова, Егор Пазенко, Даниил Белых, Денис Никифоров және Андрей Руденский сынды жандарды көрді.
Дегенмен, қызыл кілем үстіндегі жұлдызды шеруде көрермендердің өлшеусіз қошеметі Олимпиада чемпионы Илья Ильин мен «Жаужүрек мың бала» картинасының актерлеріне көрсетілді.
Атышулы қонақтардың тізімі мұнымен шектелмейді. Америкалық актер Деннис Хейсберттің Алматыға келетінін, «Троя» сынды әйгілі кинотуынды түсірген голливудтық режиссер Вольфганг Петерсен қазылар алқасына жетекшілік ететіндігін бұған дейін де жазғанбыз. Кинофестиваль мәреге жетіп, жеңімпаздарды марапаттайтын күні көптен күттірген қонақтардың бірі — атақты «Үндіқытай» фильмінің актері, «Оскар» иегері Венсан Перес те (Швейцария) келіп жетті.
Жер-көктің бәрінен шақырту алып, аяқ-қолдары жерге тимей тұрған кино жұлдыздары Қазақстанға қонақ болу үшін ғана келе салған жоқ. Жаңа жобалар, жаңа идеялар мен тосын келбет иелерін «аулап» жүрген адамның бірі — халықаралық қазылар алқасына жетекшілік еткен Вольфганг Петерсен екен. Ол киноапталық аясында сұхбат берген күндердің бәрінде қазақ режиссері Ақан Сатаевтың «Жаужүрек мың баласын» көргенін, қазақ актерлерінің бет пішіні ерекше тартымды екендігін атаған болатын. «Мен қазақтардың келбеті ғажайып деп есептеймін. Қазақстан кинематографиясын әлем тануы тиіс», деген болатын Петерсен мырза. Голливуд режиссері осы мәлімдемесі арқылы келешекте түсірілетін картиналарына қазақ актерлері түсуі мүмкін екендігіне емеурін білдірді.
Аталмыш кинофестивальдің тағы бір ерекше тұсы қазақ кинематографиясының алыбы — актер Асанәлі Әшімовтің 75 жылдығы болатын. «Еуразия-2012» аясында мерейлі жасқа келген актерге америкалық әріптесі Деннис Хейсберт «Қазақ киносының аңызы» деген мүсіншені табыс етті.
Енді мына мәселені айтайық. Қыркүйектің 21-і күні Алматыдағы Республика сарайында салтанатты түрде жабылған кинофестивальдың Гран-При жүлдесі биыл берілмеді. Әдетте жыл сайын «Еуразия» кинофестиваліне 12 картина қатыстырылатын. Алайда, биылғы кинобәсекеде 11 фильм бақ сынады. Өйткені, халықаралық кинофестивальдың басталуына санаулы күндер қалғанда ресейлік дистрибьютор — «Русский репортер» компаниясы «Аңшылық» картинасын кинофестивальға ұсына алмайтындығын жеткізген. Кезекті «Еуразия» кинофестивалінің жабылу салтанатында осы кинофестивальдың директоры болып табылатын әрі «Қазақфильм» киностудиясы АҚ президенті Ермек Аманшаев биыл Бас жүлде ешқандай картинаға бұйырмайтындығын мәлімдеді. Есесіне «Ең үздік режиссерлік жұмыс» жүлдесі екі бірдей режиссерге берілді. Қазылар алқасы мұндай дәреже Түркиядан келген Учкун Алперге «Мәңгіліктің шегі жоқ» картинасы мен Франция, Польша, Германия бірігіп шығарған «Сырыңды ашып айту» фильмі үшін Малгожата Шумовскаға лайық деп шешім қабылдаған.
Ал ФИПРЕССИ жүлдесін Алексей Мизгиревтің «Конвой» (Ресей) лентасы алды. Бұл картина мұнан да бөлек тағы бір бәйгені иемденді. «Конвой» фильмінде басты рөлде ойнаған қазақ актері Азамат Нығманов «Ең үздік ер адам рөлі» сыйлығына лайық деп табылды. «Ең үздік әйел адам рөлі» жүлдесі «Сырыңды ашып айту» картинасында басты рөлдердің бірін ойнаған Анаис Демустьеге берілді.
Дәстүр бойынша кинофестивальдың жабылу салтанатында Гран-Приді жеңіп алған фильм көрсетілетін. Жоғарыда атап өткендей, Бас жүлде ешкімге берілмегендіктен, бұл шара «Жаужүрек мың бала» картинасының салтанат құруымен аяқталды.
Осы арада Оскар сыйлығына ұсынылған «Жаужүрек мың бала» картинасын шетелдік БАҚ голливудтық ассоциациясының жетекшісі «Алтын глобус» киножүлдесіне ұсынатындығын мәлімдеді. Ал бұл жүлде дәрежесі жағынан әлемдегі «Оскар» мен «Грэмми» жүлделерінен кейінгі үшінші орындағы беделді байқау екендігін айту жеткілікті.
Халықаралық «Еуразия» кинофестивалі 1998 жылдан бері өткізіліп келеді. Жылына бір рет жарық көретін «International Film Guide» журналы 2012 жылы «Еуразия» кинофестивалін әлемдегі көшбастаушы 35 кинофестивальдың қатарына қосқан.
