Вильнюс қаласында қазіргі заманғы Қазақстанға арналған көрме ашылды

Вильнюс қаласында қазіргі заманғы Қазақстанға арналған көрме ашылды. Көрмені ұйымдастыруға Қазақстан Республикасының Балтық елдеріндегі елшілігі, Вильнюс мемлекеттік кітапханасы мен Литваның экслибрис бағытымен айналысатын суретшілер клубы мұрындық болды. Бұл туралы KZ-today тілшісіне ҚР СІМ-нің баспасөз қызметінен хабарлады.

Көрмеге қазақстандық суретшілердің графикалық миниатюралары мен тәуелсіз Қазақстанның тарихына қатысты фотосуреттер жинағы қойылған. Көрменің ашылу салтанатына Литваның өнер және ғылым қайраткерлері, дипломатиялық миссиялардың өкілдері, студенттер мен мектеп оқушылары қатысты.

Көрмеге қатысушылардың пікірінше, мұндай шараларды өткізіп тұру екі ел халықтары арасындағы достық байланыстарды нығайтуға және оны дамытуға түрткі болмақ. Литваның мәдениет қайраткерлері қазақстандық әріптестерімен өзара ынтымақтастықты одан әрі жалғастыра түсуге ниет білдіріп, Қазақстанға үлкен қызығушылық танытты.