Биылғы біріншілікте «Алматы», «Атырау», «Есіл» (Петропавл), «ТНК Казхром» (Хромтау), «ШығысҚорғасынҚұрылыс» (Өскемен) командаларымен бірге Оралдың «Конденсаты» да күш сынасады. Осы командалар қалаларында біріншіліктің алты туры өткізіліп, соның қорытындысы бойынша үздік шыққандар плей-офф бәсекесінде жүлделі орындар үшін таласады.
Құрылғанына 10 жыл толып отырған Оралдың «Конденсаты» 2000-2001 жылғы біріншілікте бірден Қазақстан чемпионы атанған болатын. Содан кейін де бірнеше рет чемпионат жүлдегері, кубок иегері атанып үлгерді.
Игорь Никольченко жаттықтыратын оралдық команда биылғы ҚР кубогі үшін бәсекеде қола жүлдеге қол жеткізген болатын. Құрамында Қазақстанның бас командасына шақырылып жүрген Виталий Вориводин, Қайрат Байбеков сынды ойыншылары бар «Конденсат» биылғы маусымда да жүлделі орындарға қол созуды мақсат етіп отыр.
