«Алматы-Астана тас жолының 406-шы шақырымында Оңтүстік Қазақстан облысының автобусы тоқтатылып, онда нормадан тыс 42 жолаушы болып, ал олардың 8-і жүк салғышында бара жатыпты. Олар Ресей Федерациясына жұмысқа бара жатқан», — деп агенттікке облыстық ІІД баспасөз қызметінің жетекшісі Роза Қалдыбекова мәлім етті.
Ол жолаушыларды автобуспен нормадан тыс алып жүру фактісі маусымның 3-5 аралығында жүргізілген «Қауіпсіз жол» арнайы акциясы барысында анықталды дейді.
«Автобус жүргізушісіне қатысты жолаушылар тасымалдау ережесін бұзғаны үшін әкімшілік іс қозғалды», — дейді ведомство өкілі.
Одан басқа, полицейлік арнайы шара барысында ЖЖЕ-ні бұзудың 2 мыңнан астам фактісі анықталып, оның ішінде көлікті мас күйінде басқарудың 74 фактісі анықталды.