Жамбыл облысында Тәжікстандық есірткі тасымалдаушылар 27 кило героинмен ұсталды

Жамбыл облысы "Мерке" кеденінің қызметкерлері Бішкек-Мәскеу бағытындағы поезбен 26,8 кило героин алып өтпек болған Тәжікстанның 4 азаматшасын ұстады. Бұл туралы KZ-today тілшісіне Жамбыл облыстық кедендік бақылау департаментінің баспасөз қызметінен хабарлады.

Баспасөз қызметінің ақпаратына сәйкес, есірткі тасымалдаушыларды 6-маусым, дүйсенбіде №17 поезға кедендік тексеру кезінде кеденшілер тобы ұстады. Есірткі қосалқы түбі бар сөмкеге жасырылыпты. Табылған героиннің жалпы салмағы 26,852 кило болды.

Департамент ақпаратына сәйкес, бұл — «Мерке» кеден бекетінің тарихында қолға түскен ең ауқымды есірткі партиясы.
Бұл дерекке сәйкес, ҚР Қылмыстық кодексінің «Аса ірі көлемде есірткі сақтау және тасымалдау жөніндегі» 259-бабы бойынша қылмыстық іс қозғалды.