Бұл туралы Caravan.kz медиа порталы хабарлайды.
Коронавирусты жұқтырған 1974 жылғы азаматша болып шықты. Індетке шалдыққан азаматша жайлы Жаңаөзен қаласының әкімі Мақсат Ибағаров instagram желісіндегі парақшасында жазды.
"1974 жылы туған азаматшаның дене қызуы көтеріліп, жедел жәрдем көмегіне жүгінген, медицина қызметкерлері тарапынан оның қан талдамалары алынып, індеттің белгілері анықталды.
Қазіргі таңда азаматша Жаңаөзен қалалық провизорлық орталыққа оқшауланды, жағдайы бірқалыпты. Жауапты мамандармен вирус жұқтырған азаматшамен қарым-қатынаста болғандардың тізімі анықталуда.
Коронавирус инфекциясы анықталған ошаққа және оның аумағына залалсыздандыру жұмыстары жүргізілуде.
Құрметті жаңаөзендіктер!
«Сақтансаң, сақтарым» дегендей, баршаңызды сабырлыққа шақыра отырып, Коронавирус инфекциясының адам ағзасына қаншалықты қауіпті екендігін түсініп, өз туыстарыңыздың болашағына бей-жәй қарамай, өмірлеріне алаңдаушылық білдіріп, медицина мамандарымен ұсынылатын Ережелерді бұлжытпай орындауға және Маңғыстау облысы бойынша бас мемлекеттік санитарлық дәрігері Е.Сыдымановтың 06.04.2020 жылдан бастап өңірімізде күшейтілген карантин режимін енгізу туралы қаулысын басшылыққа алып, тәртіпке қатаң бағынуға шақырамын", — деп жазды қала әкімі.