Бұл туралы Caravan.kz медиа порталы хабарлайды.
Талантты композитор Серік Еркімбеков өзінің авторлық кешін әкесі, еліміздің мәдениетінің дамуы жолында еселі еңбек еткен Жексембек Еркімбековтың 95 жылдығына арнады.
Концертте дирижер Қанат Омаровтың жетекшілігімен Т. Әбдірашев атындағы ҚР Мемлекеттік академиялық симфониялық оркестрі, Қазақстанның еңбек сіңірген қайраткері Бейімбет Демеуовтің жетекшілігімен Б.Байқадамов атындағы Мемлекеттік хор капелласы және де Қазақстанның еңбек сіңірген қайраткері Талғат Мұсабаев, Мемлекеттік «Дарын» сыйлығының лауреаты – Асқар Мұқият, Париждегі халықаралық байқаудың лауреаты (Гран При) — Нұргүл Нүсіпжан, Халықаралық байқаудың лауреаттары: Гүлнұр Саргизова, Ақынер Айлин, Шыңғыс Нұрғалиұлы, Аружан Төлепберген және К.Байсейітова атындағы дарынды балаларға арналған РММОМИ скрипкашылар ансамблі өнер көрсетті.
Концерттік бағдарламада композитор Серік Еркімбековтыңоркестр мен хорға арналған үздік шығармалары «Шәкәрім» симфониясы, «Мәңгілік алау» балетінен пролог және тағы да басқа туындылары орындалды.
Кеште қарапайым тыңдармандардан бөлек, Жексембек Еркімбековтың замандастары мен үзеңгілес қызметтестері, ұрпақтары құрметті қонақ болды.
Концерт аяқталғаннан кейін көпшілік шапалақ ұрып, концертте өнер көрсеткен барлық ұжымға алғысын білдірді.
Жексембек Еркімбеков — 1966-1976 жылдары Қазақ КСР-і Мәдениет министрлігінде өнер басқармасының бастығы, министрдің орынбасары, 1976-1987 жылдары Мәдениет министрі болып қызмет етті. Бұдан бөлек, Жексенбек Еркімбекұлы Құрманғазы атындағы Қазақ ұлттық консерваториясының құрметті профессоры, Қазақ КСР-і Жоғарғы Кеңесінің депутаты болды.