16 желтоқсанда Қостанай – Әулиекөл – Сұрған тасжолында жантүршігерлік жол апаты орын алды. Қаза тапқан үш адамның облыста мұғалім екені белгілі болды, деп хабарлайды Caravan.kz медиа порталы.
«Дәстүр бойынша, жаңа жылға дейін жолда мұғалімдер қайтыс болады. Олимпиадаларға барған ауыл үздіктері, аудан орталығында аттестация тапсыратын мұғалімдер жиі қаза табады. Оған себеп — қарлы жолдар, боран және бөлу жолақтардың болмауы.
Жол ережесін бұзған жүргізушілерден түсетін миллиондық айыппұлдар қайда кетеді? Жолдарды қалпына келтіруге жұмсалмайтыны анық. Жолдардың сапасы нашар, жөндеу жұмыстары жасалмаған. Бөлу жолақтары да қойылмаған. Ал орташа жылдамдықты асырғаны үшін енгізілген жаңа айыппұл нормасы жолдағы адам өмірін сақтап қалуға көмектеспейді», — деп жазды журналист Гүлбану Әбенова.
35 жастағы Карина Лаврик Заречный ауылының мектеп-лицейінде орыс тілі мен әдебиетінен сабақ берді. 48 жастағы Луиза Ашаева Чураков жалпы білім беретін мектебінің педагог-психологы. Екеуі де бұрын Қазан жалпы білім беретін мектепте жұмыс істеген. Қаза тапқандардың арасында 22 жастағы Алина Абрамова да бар. Ол Қостанай педагогикалық колледжін бітіргеннен кейін, ЖОО-ға сырттай түсіп, гуманитарлық бағыттағы жеке мектепте еңбек етіп келген.
Барлық жолаушылар мерекелік демалыстарын туған-туыстарының арасында өткізіп, енді қайта облыс орталығына келе жатқан. Зардап шеккендердің арасында 11 жасар бала мен оның анасы да бар. Баланың аяғы кесілген, анасы да жарақат алған.