Жыл басынан бері Ақтөбе облысында тұрғын үйлерді салуға 1,5 млрд. теңге игерілді

Үстіміздегі жылы Ақтөбе облысында тұрғын үй құрылысын салу мақсатында өткен жылғыдан екі есе артық қаржы жұмсалған. Инвестиция көлемі 1,5 млрд. теңгеден асты. Бұл қаржының үштен бір бөлігі жеке жер үйлерді салуға жұмсаған ақтөбеліктердің өз қаржысы болса, оның 75 проценті облыс орталығының үлесінде.

«Жыл әлі аяқталмаса да, біз 7 бірдей көп пәтерлі тұрғын үйді пайдалануға беру мүмкіндігіне ие болдық. Сондай-ақ, Ақтөбедегі «сақалды құрылыстар» жойылды «,- дейді облыстың бас сәулетшісі Болат Егінбаев.
2004-жылы қалалық әкімшіліктің «Әбден тозығы жеткен апатты жағдайдағы үйлерді жөндеу» атты жобасының есебінен қалалық тұрғын үй қоры тағы да ұлғайғалы отыр. Үш жылға есептелген бағдарламаны жүзеге асыруға 248 млн. теңге қарастырылған. Биылғы жылы қалалық биліктің бастамасы бойынша 21 млн. теңгеге бірнеше үйлер мен жатақханалар жөнделді.