Бұл туралы Сaravan.kz медиа порталы kazinform.kz-ке сілтеме жасап хабарлайды.
Еуропалық сыртқы әрекет қызметінің мәліметінше, қираған ғимараттар қатарында Газа секторындағы ең ірі медициналық кешен, мүлде істен шыққан Әл-Шифа ауруханасы да бар.
«Газадағы қалған ауруханалар жартылай және елеулі шектеулермен жұмыс істеуде. Күрделі жағдайға байланысты олардың көпшілігі күйреу алдында тұрды немесе жабылуға мәжбүр болды. Газадағы палестиналықтар үнемі атқылау жағдайында өмір сүріп жатқанда және ауыр жарақат алған 9 мыңнан астам ауыр адам тиісті медициналық көмектің жоқтығынан өлім аузында тұрған кезде шұғыл медициналық көмекке қол жеткізу одан да маңыздырақ болып отыр», — деп атап өтті Еуроодақ өкілдері.
Өткен жылдың 7 қазанынан бері ДДҰ денсаулық сақтау мекемелеріне барлығы 890 шабуылды тіркеді, оның 443-і Газада және 447-сі Батыс жағалауда болды.
«Медицина қызметкерлеріне, ауруханаларға және жедел жәрдем машиналарына жасалған шабуылдар адам өмірі үшін аса маңызды денсаулық сақтау қызметтеріне зиянын тигізеді. Бұл шабуылдар тоқтауы керек. Сонымен бірге, халықаралық гуманитарлық құқық бойынша азаматтық тұлғаларды міндетті қорғауға қатысты ЕО ауруханаларды медицинадан басқа кез келген мақсатта пайдалануды қатаң айыптайды», — деп атап өтті ЕО дипломатиялық қызметі.
ЕО сонымен қатар соңғы айларда 50-ден астам денсаулық сақтау мекемесі мен 300 жедел жәрдем көлігіне қасақана зақым келген Батыс жағалаудағы денсаулық сақтау жүйелеріне шабуылдардың жалғасуына алаңдайды.
«Біздің көз алдымызда нақты уақытта адам трагедиясы болып жатыр. Еуропалық Одақ Газа секторындағы бейбіт тұрғындардың зардап шегуіне қатты алаңдаулы. Біз дереу атысты тоқтатуға, барлық кепілге алынғандарды босатуға және толық гуманитарлық көмекке қол жеткізуге шақырамыз», — деп атап өтті Брюссель.