Бұған авиаотын бағасының қымбаттауы мен әлемдегі тұрақсыз жағдай әсер етіп отыр. Соған қарамастан, қазақстандықтар арасында танымал туристік бағыттардың басым бөлігі әзірге ашық, — деп хабарлайды Caravan.kz медиа порталы.
Азаматтық авиация комитеті не дейді?
Қазақстанның Азаматтық авиация комитеті қазіргі уақытта Еуропа елдерінен авиаотын тапшылығы немесе қазақстандық әуе компанияларының рейстеріне шектеу қою туралы ресми хабарлама түспегенін мәлімдеді.
Сондай-ақ шетелдік әуе тасымалдаушылары да Қазақстанға рейстерді қысқарту немесе тоқтату жөнінде ақпарат бермеген.
Алайда сарапшылар әлемдегі жағдай әлі де құбылмалы екенін айтады. Тіпті Таяу Шығыстағы қақтығыстар тоқтап, Ормуз бұғазы қайта ашылған күннің өзінде, авиаотын нарығы бірден қалпына келмейді. Логистика мен мұнай өңдеу зауыттарының жұмысы бірнеше айда ғана реттелуі мүмкін.
Қандай бағыттарда шектеу бар?
Қазіргі уақытта Қазақстан мен негізгі туристік елдер арасындағы әуе қатынасы қалыпты режимде жұмыс істеп тұр. Тек Таяу Шығыс бағыттарында белгілі бір шектеулер бар.
Мәселен, FlyDubai компаниясының Біріккен Араб Әмірліктеріне рейстері аптасына 13 рейспен шектелген. Ал кейбір қазақстандық әуе компаниялары қауіпсіздік мақсатында бұл бағыттарға уақытша ұшуды тоқтатты.
Неліктен әуе билеттері қымбаттап жатыр?
Әуе билеттерінің қымбаттауына басты себеп — авиаотын бағасының күрт өсуі. Әуе компаниялары отын шығынын билет бағасына қосады. Сондықтан жанармай қымбаттаған сайын билет құны да өседі.
Сонымен қатар ұшақтар тек Қазақстанда ғана емес, баратын елдерде де жанармай құяды. Әр мемлекеттің авиаотынға қоятын өз тарифі бар.
Бірнеше жыл бұрын Алматыдан Римге билет шамамен 350 долларға сатылса, кейін 500 долларға дейін өсті. Ал қазір алдын ала алған билеттің өзі айтарлықтай арзан болмай қалды.
Биыл жазда билеттер қанша тұрады?
Барселона
Air Astana әуе компаниясы Алматы — Барселона бағытына маусым айына мынадай ең төменгі тарифтер ұсынып отыр:
- бару — 414 доллар;
- қайту — 659 доллар;
- жалпы құны — шамамен 1073 доллар.
Анталия
Түркияға ұшу бағасы да айтарлықтай өскен:
- бару — 385 доллар;
- қайту — 418 доллар;
- жалпы құны — шамамен 803 доллар.
Сарапшылардың айтуынша, турфирмалар арқылы чартерлік рейспен жолдама алу сәл тиімді болуы мүмкін. Бірақ биыл туроператорлар да бағаны көтеруге мәжбүр.
Қазақстандықтарға қолжетімді бағыттар
Соңғы жылдары қазақстандықтар арасында Грузия мен Арменияға саяхаттау танымал бола бастады.
Ереван
SCAT әуе компаниясы Алматы — Ереван бағытына (19–27 маусым аралығы) мынадай баға ұсынып отыр:
- бару — 162 906 теңге;
- қайту — 154 300 теңге;
- жалпы құны — 317 306 теңге.
Тбилиси
Air Astana Алматы — Тбилиси бағытына:
- бару — 257 доллар;
- қайту — 252 доллар;
- жалпы құны — шамамен 510 доллар.
Мамандардың пікірінше, бұл бағалардың ішінде Қазақстан мен баратын елдердегі авиаотын құнының өсуі толық ескерілген.