Оның атап өтуінше, Қазақстан — Азия мен Еуропаны жалғайтын көпір. Бұл ретте Моңғолия Қазақстанды Шығыс және Оңтүстік-Шығыс Азиямен байланыстыратын географиялық нүкте тұрғысында ең жақын орналасқан орын бола алады. Ал Қазақстан Моңғолияны Еуропамен жалғастыратын ең жақын көпір болуға қауқарлы. «Бұл тұрғыда әрі қазіргі қажеттілікке орай екі ел арасындағы көлік байланысын, нақты айтқанда, әуе және жол көліктерін дамыту ерекше маңызды мәселе. Осы ретте қазақстандық тарабы Ұланбатырдағы «Шыңғыс хан» халықаралық әуежайынан бөлек Моңғолияның батыс бөлігінің қиырында орналасқан «Хобда» халықаралық әуежайын да пайдалана алар еді», — деді Елші.
Ж. Сухээнің сөзіне қарағанда, бүгінгі таңда Моңғолия Ұланбатырдан 50 шақырым жерде жаңа ірі халықаралық әуежай құрылысын қолға алды. 2015 жылы құрылыс толық аяқталуы жоспарланып отырған әуежай халықаралық әуе қатынасының ірі хабтарының біріне айналмақ.