Ойын аса тартысты өтті. Матч барысында бірде «Қазцинк-Торпедо», бірде «Нефтяник» бір шайбамен алға шығып, жанкүйерлердің жүйкесін жұқартты. Бірінші кезеңде біздің хоккейшілер көзге түссе, екінші кезең қарсылас команданың пайдасына шешілді. Ал үшінші кезеңде «Қазцинк-Торпедо» тағы бір шайба соғып, 3:2 есебімен жеңіп жатты. Алайда соңғы минуттарда таразы басы теңесті. 3:3. Қосымша уақытта біздің хоккейшілерде талай мүмкіндіктер болды. «Қазцинк-Торпедо» бір, тіпті екі ойыншыға артық ойнады. Дегенмен, «Нефтяниктің» қақпашысы барлық шабуылдарды шебер тойтара білді. Сосын буллит сериясы белгіленді. Мұнда соңғы жылдардағы ең көп — 18 буллит соққысы жасалды. Жанкүйерлер қақпашылардың аса тартысты бәсекесіне куә болды. Ал Александр Волжанкиннің мергендігі арқасында «Қазцинк-Торпедо» бұл ойында жеңіске жетті. Қорытынды есеп — 4:3 (Б)
Сонымен, екі ойыннан кейін Өскемен қаласының «Қазцинк-Торпедосы» тағы екі ұпайға ие болып, жалпы турнирлік кестеде екінші орынға көтерілді.