Оған екі елдің төтенше жағдайлар, қорғаныс және ғарыш саласындағы мемлекеттік органдар мен компаниялардың сарапшы мамандары қатысуда. Олар төтенше жағдайларды ғарыштан бақылау мен болжаудың бірлескен жүйесін құру жоспарын орындау барысын жан-жақты қарастыруды көздейді. Аталған құжат үш жылдың ішінде орындалуы шарт. ҚР Төтенше жағдайлар министрі Владимир Божко атап көрсеткендей, соңғы екі жылдың ішінде біраз жұмыстар атқарылды. «Енді, барлық іс-шараларды іс жүзінде орындау қажет. Мәселен, қазір Қазақстанның территориясын ғарыштан бақылау жерсерігі құрастырылып жатыр. Келесі кезекте біз жердегі инфрақұрылымды барынша дамытуымыз қажет», — дейді В. Божко.
Айта кетейік, төтенше жағдайларды ғарыштан бақылау мен болжаудың бірлескен жүйесін құру жөніндегі Қазақстан — Ресей жұмыс тобы 9 құжатты қарастырып, даярлауды жоспарлап отыр. Соның арқасында қар көшкіні, су тасқыны, өрт және тағы басқа табиғи-техногендік апаттарды ғарыштан түсіріп, шұғыл түрде өзара ақпарат алмасуға болады.