Бұл туралы Caravan.kz медиа порталы Қазақпарат-қа сілтеме жасап хабарлайды.
Ішкі істер министрлігі Цифрлық даму, инновациялар және аэроғарыш өнеркәсібі министрлігімен бірлесіп, Қазақстанда алғаш рет «Құжаттау терминалы» арқылы азаматтарға паспорт пен жеке куәлікті рәсімдейтін пилоттық жобаны іске қосуда. Енді кез келген азамат төлқұжат немесе жеке куәлік алуға өтінімді дербес жасай алады.
«Терминал ҚР ІІМ дерекқорындағы фотосурет бойынша жеке тұлғаны биометриялық сәйкестендіру камераларымен, қолтаңбаны оқу үшін сканермен және мемлекеттік бажды төлеу үшін QR-кодпен жабдықталған. Оны пайдалану үшін клиент барлық деректерді толтырып, биометриялық сәйкестендіруден өтіп, суретке түсіп, қол қойып, QR коды бойынша қызметке ақы төлеуі керек», — деді Ішкі істер министрлігінің онлайн-брифингінде ведомство өкілі Шұғыла Тұрлыбек.
Терминал арқылы өтінім берген соң, қызмет алушы көші-қон қызметкеріне жүгінуі қажет. Ол өтініштің, фотосуреттің және қолтаңбаның сәйкестігін тексереді. Процесс бірнеше минутқа созылады.
«Бұл ыңғайлы және жылдам. ХҚКО-да дайын құжаттарды берудің автоматтандырылған пункті жұмыс істейді. Тұтастай алғанда, бұл технология мемлекет ұсынатын қызметтердің сапасы мен жылдамдығын арттырады, құжат рәсімдеу мерзімін едәуір қысқартады, сыбайлас жемқорлық тәуекелдерін азайтады, өйткені барлық процестер ашық болады», — деді Ш. Тұрлыбек.