Мәскеуде Олжас Сүлейменовтың шығармашылық кеші өтті

Олжас Сүлейменовтың шығармашылық кеші Қазақстандық суретшілер Шыңғыс Ноғайбаев пен Зәуре Смағұлованың туындылары көрмесімен және «Алтын ішек» скрипкашылар оркестрінің концертімен ашылды.

«Соңғы уақытта Қазақстан Ресейге бұрын-соңды болмаған қарқынмен мәдени экспансияға шықты. Бұл әрине, тек қолдауға тұрады»,- деді шығармашылық кешті ашқан РФ президентінің ТМД елдерімен гуманитарлық ынтымақтастық мәселелері бойынша арнаулы өкілі Джахан Поллыева.
Оның айтуынша, Ресей мен Қазақстанның мәдениет өкілдерінің іс-қызметі екі елдің экономикасы мен саясатына да үлкен әсер етіп отыр.
«Қазақстандағы Ресей жылы аяқталғанына қарамастан, екі халық аарсындағы достыққа уақыттық шектеу қойылмаған»,- деді Д.Поллыева.
Қазақстан Республикасының Ресейдегі төтенше және өкілетті елшісі Қырымбек Көшербаев соңғы екі жылда екі жақты тауар айналымы бірнеше есе өскенін атап өтті. «2003-жылы екі ел арасындаы тауар айналымы 5 млрд. долларды құраса, 2004-жылдың аяғында бұл көлем 8 млрд. доллардан асады»,- деді ол.
Өзара ынтымақтастыққа оңды мысал ретінде елші жуырда жүзеге асырылатын қазақстандық тұңғыш «Астана» мұнай танкерін суға жіберу шарасын атады. Қ.Көшербаев сондай-ақ екі ел арасындағы дипломатиялық тәжірибеде бірегейге саналатын «Мәңгілік достық туралы декларацияға» қол қойылғанын атап өтті.