«Әр бағыт бойынша жеңімпаз ғылым қорынан грант түрінде бір миллион теңгеден алады», — деді А. Нүсіпова. Ғылым қоры журналистер арасында таратқан материалдарға сәйкес, қатысушылардың жасы 35-тен аспауға тиіс. Сондай-ақ, бұл байқауды жыл сайын өткізіп отыру жоспарланған.
Басқарма төрайымы бұған қоса қордың «келесі жылы жас ғалымдардың ғылыми зерттеулері мен жобаларын ақшалай қолдау үшін корпоративтік қор құру жөнінде Қазақстанда жұмыс істейтін отандық және шетелдік компаниялармен келіссөздер жүргізіп жатқанын» хабарлады.
«Болашақта біз жергілікті атқарушы билік органдары, басқа да даму институттары мен компаниялардың қатысуымен «Жобалар биржасын» құруға күш салатын боламыз. Бұл биржаның көмегімен біз Қазақстанда жасалып жатқан жобалар жөніндегі ақпараттармен алмасып, басқа да даму институттарымен бірлесе отырып жобалардың қайталануына және мемлекет қаржысын талан-таражға түсуіне жол бермей тиімді жүзеге асыра алар едік», — деді А. Нүсіпова. Ол сондай-ақ, «Интеллектуалдық генофонд» атты мәліметтер базасының жобасы жасалып жатқанын, онда республика мен шетелдерде жұмыс істейтін қазақстандық ғалымдар жөніндегі толық ақпарат жинақталатынын жеткізді.