«Мигрант» операциясы 11 наурызда басталған. Полицияның ақпаратына сүйенсек, 93 заң бұзушының 81-і ТМД елдерінің азаматтары, ал қалған 12-сі алыс шетелдердің азаматтары. «Өрескел заң бұзушылықтары үшін 12 адамға қатысты ел аумағынан шығарып жіберу туралы шешім қабылданды. Тағы 8 адам қабылдап-таратқыш панажайға жатқызылды», — деп атап көрсетті баспасөз қызметі.
Мысалы, Екібастұздағы операция барысында полиция қызметкерлері Ресей азаматын қамауға алған. 35 жастағы ер адам Қазақстанға заңсыз келіп көші-қон қызметінен жасырынып жүрген. Сонымен бірге, Павлодарда 40 жастағы Әзербайжан азаматы тұтқындалған. Ол да еліміздің аумағында заңсыз жүрген.
Полиция департаменті шетел азаматтарынан басқа төлқұжат-виза ережелерді бұзғаны үшін 37 қазақстандық әкімшілік жауапкершілікке тартылған. Оның жиырмасы — құжатсыз не тіркеусіз тұруға жол бергені үшін, он төрті — оларға келген шетелдіктердің келу мерзімі өткеннен кейін елден кету шараларын қабылдамағаны үшін, тағы үш адам — шетелдік жұмыс күшін заңсыз пайдаланғаны үшін жауапқа тартылған.
«Осылардан басқа «Мигрант» операциясының аясындағы шараларды пысықтау барысында полиция қызметкерлері үш қылмыскерді қолға түсірген. Оның бірі адам өлтіргені үшін іздеуде болған», — деп хабарлады ІІД баспасөз қызметі. Мұнда операцияның басты мақсаты заңсыз көші-қонға қарсы әрекет ету, сондай-ақ, гастарбайтерлерді заңсыз пайдалану оқиғаларын анықтау және қылмыстың алдын алу екендігін еске салды.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті