Сан мыңдаған көрерменнің көзайымына айналған бағдарлама наурыз айының 13-де басталған болатын. Екінші маусымның жеңімпаздары биыл да қазылар алқасы мен көрермендердің берген дауыстарының нәтижесінде белгілі болды. Ол жеңімпаз жұлдызды жұп — белгілі актер, тележүргізуші, Рахман Омаров пен танымал әнші Маржан Арапбаева.
Жеңімпаздарды құттықтау рәсімде сөз сөйлеген телеарнаның басқарма төрағасы Жанай Омаров: «Бәріміз бүгінде халықтың көңілінен шыққан бағдарламаны, бүкіл халықтық сауықтық думанға айналған керемет ән мерекесін 4 ай бойы тамашаладық. Меніңше, осы жобаға қатысқан 16 жұптың барлығы жеңімпаз деп атануға лайық. Жобада ешкім жеңілген жоқ. Сондықтан, «Екі жұлдыз» жобасының барлық жеңімпаздарын шын жүректен құттықтаймын. Жобаға атсалысқан ұйымдастырушылар мен әділқазылар алқасына алғысымды айтамын. Бүгін жоба шымылдығын жапса да, баршаңызға Екі жұлдыз «қош» деп айтпайды, күзгі үшінші маусымдағы жобада жүздескенше дейді, қымбатты достар», деді.
Оның айтуынша, «Екі жұлдыз» жобасының ең басты нәтижесі — ол елімізде жұлдыздарды қалыптастыру институтына айналып, өз үлесін қосуында, сондай-ақ жобаның жаңа кәсіби, жоғары деңгейге көтеріліп, халықтың көңілінен шығып, халықтық сауық-думанға айналғандығында.
Барлық қатысушылар арнайы естелік сертификаттармен және бағалы сыйлықтармен марапатталды.