Жарияланды: 40

Айдаламен қашқан мас жүргізушіні ұстау операциясы видеоға түсіп қалды

Айдаламен қашқан мас жүргізушіні ұстау операциясы видеоға түсіп қалды  Сурет - Almaty.tv

Полицейлердің айтуынша, отыз жастағы ауыл тұрғыны алкогольді шамадан тыс ішіп, әкесінің көлігімен жолға шыққан

 Павлодар облысында полицейлер айдаламен қашқан мас жүргізушіні тұтқындады, деп хабарлады Polisia.kz

Ресми мәліметке сәйкес, 10 қыркүйек күні сағат 17.45-те патрульдік полицейлер Омбы тас жолында Достық кентіне жақын жерде "ВАЗ 2107" көлігін байқаған. Көлік жүргізушісі жоғары жылдамдықпен жүрді. Сонымен қатар, көліктің ирелеңдеп қозғалғаны күдік туғызған.

"Полицейлер көлікті тоқтатуға тырысқанымен, жүргізуші олардың талаптарын елемеді. Керісінше, жылдамдықты арттырып, Павлодар қаласына қарай жүре берген. Полицейлер оны Мичурин ауылының маңында ұстады", – дейді Нұрлан Мәсімов.

Анықталғандай, 30 жастағы ауыл тұрғыны алкогольді тым көп ішіп қойған. Одан кейін әкесінің көлігін алып, жолға шыққан. Ер адамның көлік жүргізу куәлігі болмаған. Тіпті, ондай құжатты алған да емес.

"Оған қатысты Әкімшілік құқық бұзушылық кодексінің 608 және 612-бабы бойынша әкімшілік іс қозғалды. Ал автокөлік айыппұл тұрағына қойылды. Іс материалдары сотқа жіберілді", – деп атап көрсетті Мәсімов.

Айта кетейік, Павлодар облысында жыл басынан бері мас жүргізушілердің қатысуымен 14 жол-көлік оқиғасы тіркелді. 2 адам қайтыс болып, 19-ы жарақат алды. Тағы 734 жүргізушіні полиция мас күйінде басқарғаны үшін ұстады.



 

Пікір қалдырыңыз

Пікір қалдыру тіркелген пайдаланушылар ғана мүмкін