Батыс Қазақстан облысында өрт қауіпсіздігі тәртіптерін сақтамауға байланысты 13 мектеп пен интернаттың жұмысы тоқтатылды

Н.Маштаковтың айтуынша, мемлекеттік өртке қарсы күрес басқармасы тарапынан білім беру мекемелеріне жүргізілген тексеру қорытындысы бойынша мектепке дейінгі мекемелер мен мектептердің, сондай-ақ, облыстағы екі бірдей жоғары білім ошағының жұмысын тоқтату туралы 28 іс матералдары сотқа жіберілген. 125 лауазым иесі әкімшілік жауапкершілікке тартылды. Тексеру барысында 813 пеш, агрегат және электр желілерінің жұмысына уақытша тыйым салынды.

Бөкейорда ауданындағы Жәңгір хан, Жаныкешев, Т.Масин атындағы орта мектептерде, №1 орта мектепте, көзі көрмейтін балаларға арналған мектеп-интернатта, Орал қалалық саңырау балаларға арналған облыстық мектеп-интернатта өрескел тәртіп бұзу оқиғалары әшкереленді.
Н.Маштаковтың айтуынша, білім беру мекемелерінің басшылары мектептер мен интернаттардағы мұндай ахуалды қаржынының тапшылығымен байланыстырады. Алайда, мемлекеттік өртке қарсы күрес басқармасы бастығының пікірінше, «өрт кезінде қашып шығуға арналған дәліздер мен есіктерді қоқыстан арылтуға қосымша қаржының қажеті жоқ».
Отырысқа қатысушылар нысандардың өрт қауіпсіздігін арттыруға шұғыл шаралар қолдану, қолда бар өрт сөндіру және байланыс құралдарының, өртке қарсы автоматикалық жүйелердің тұрақты дайындығы мен ақаусыз жұмыс істеу мүмкіндігін қамтамасыз ету туралы шешім қабылдады.