Азат Перуашев, Мәжіліс депутаты:
— Бұл салықты, бұл жүкті ең алдымен біздің олигархтар, аса бай кісілер көтеруі тиіс. Олардың көбісі миллиардтаған соммаларды шетелдік, оффшорлық зоналарға шығарып отыр ақыры.
Бюджеттің жыртығын қарашаның қалтасын қағып толтыру әділетсіздік деген төменгі палатадағы «ақжолдықтар», мәселені шешудің екі жолын айтып отыр. Үкіметте отырғандардың тең жартысы миллиардерлер, ең алдымен солардың мүлкіне, екіншіден – байлардың табысына салықты көтеру керек. Сондай-ақ депутаттар қалталылардың, әсіресе шенеуніктердің шетелге асырған қаржыларын да жіті тексеруді талап етті. Өйткені, министрлер жыл сайын бюджеттің миллиондарын тиімді игердік деп есеп бергенімен, құрылысы аяқталмай тұрған аурухана, мектептердің саны азаймай тұр. Яғни, ізім-ғайым жоғалған сол қаржы шенеуніктердің шетелдегі есеп шоттарында жатуы ғажап емес. Бүгінде осындай оффшордағы қазақстандықтардың жинағы 140 млрд долларға жетіпті.