Ертіс жағалауындағы су перісінің мүсіні балықтарды өзіне тартады

Павлодарда Ертіс өзенінің жағалауында су перісінің мүсіні пайда болды.


           «Оны елордалық мүсінші жасаған. Мүсінді дайындау шығынын демеушілер мен жергілікті бюджет бірге көтерді», — деп қалалық сәулет және қала құрылысы бөлімі мәлімдеді.
           Ұлттық нақыш үшін павлодарлық су перісіне шығыс әйелдеріне тән келбет берілген. Су перісінің құйрығындағы қабықшалар қазақша ою түрінде әсемделген. Оның омырауына Андерсеннің ертегісіндегі кейіпкердікі секілді кеудеқап кигізген.
           Су перісі жастар мен туристердің сүйікті орнына айналған. Жергілікті балықшылар ол жерде қармаққа балық жақсы іліге бастағанын айтады, өйткені мүсін балықты өзіне тартатын сыңайда.