Бұл туралы Caravan.kz порталы Tengrinews.kz-ке сілтеме жасап хабарлайды.
"Жағдайы тұрақталған өңірлердегі ведомствоаралық комиссияға демалыс күндері Ashyq жобасына қатысатын бизнес субъектілері үшін шектеу шараларын жеңілдету мәселесін қарауды тапсырамын. Ералы Лұқпанұлы, бұл сіздің бақылауыңызда", — деп тапсырды Мамин Үкімет отырысында.
Жалпы, оның айтуынша, елдегі эпидемиологиялық жағдай жақсарып, вирус жұқтыру деңгейі біртіндеп төмендей бастаған.
"Өткен аптада вирустың репродуктивті индексі 1-ден төмен болды, қазір — 0,93. Сонымен қатар, Түркістан облысынан басқа барлық өңір "қызыл" аймақта. Инфекциялық төсектердің толуы 49 пайыз және реанимациялық төсектертер — 46 пайыз. Барлығы 6,5 миллионға жуық адам бірінші компонентпен егілді, екінші компонентпен 5 миллионнан аса адам егілді. Вакцинация науқанын одан әрі күшейту қажет", — деді Асқар Мамин.
Бұған дейін премьер-министр Асқар Мамин Ashyq қатысушыларына демалыс күндері жұмыс істеуге рұқсат беру мәселесін пысықтауды тапсырған болатын.
Асқар Мамин Денсаулық сақтау министрлігіне "Атамекен" ҰКП-мен бірлесіп, Ashyq жобасына қатысушыларға демалыс күндері жұмыс істеуге мүмкіндік беру мәселесін пысықтауды тапсырды.