Мәскеуде РФ Федералдық жиынының Федералдық кеңесінде Қазақстан парламенті сенатының күндері өтеді

Сенаттың БАҚ-тармен байланыс жөніндегі бөлімінен KZ-today тілшісіне хабарлағанындай, РФ Федералдық жиынының Федералдық кеңесіндегі сенат күндері Ресейдегі Қазақстан жылына орай өткізілгелі отыр. ҚР парламенті сенатының күндерінің салтанатты ашылу рәсімі 29-қазанда өтеді. Шара бағдарламасына сәйкес "Ресей және Қазақстан : өзара тиімді ынтымақтастықты тереңдету үшін заңнамаларды үйлесімге келтіру жолдары " деген тақырыпта бірлескен парламенттік тыңдаулар , сондай-ақ, шекаралық ынтымақтастық, шағын және орта бизнесті дамытуды заңнамалық тұрғыдан қамтамасыз ету, сот-құқықтық реформалардың басты бағыттары деген мәселелер бойынша дөңгелек үстелдер өткізу көзделген. Жоғарғы палата депутаттары сондай-ақ, денсулық сақтау, әлеуметтік қамтамасыздық және жергілікті өзін-өзі басқаруды ұйымдастыру жөніндегі мәселелер бойынша заңнамалық базаны дамыту тұрғысында өзара тәжірибе алмасады. Сенат күндері аясында қазақстандық өкілдердің жетекшісі, ЕурАзЭҚ парламентаралық ассамблеясының төрағасы О.Әбдікәрімов ЕурАзЭҚ-тың бас хатшысы Григорий Рапотамен және Ұжымдық қауіпсіздік келісімі ұйымының бас хатшысы Николай Бордюжамен кездеседі деп күтілуде. 30-қазанда ҚР парламенті сенатының төрағасы О.Әбдікәрімов пен РФ Федералдық жиынының Федералдық кеңесінің төрағасы Сергей Миронов ресейлік және қазақстандық журналистерге арнап бірлескен баспасөз мәслихатын өткізеді.