Қазір банк пен халыққа қызмет көрсету орталығының арасында сандалып жүргендер көп. Екі мекеме бір-біріне жібереді екен тұрғындарды. Осы мәселелер бойынша кеңес беретін бірыңғай байланыс орталығына хабарласу мүмкін емес. Жыл соңына дейін жалғасатын кешірім науқанына көп балалы аналар іліге алмаймыз ба деп алаңдаулы.
Бұл туралы Бірінші арна Еуразия хабарлайды.
Мемлекет несиесін өтеушілерді бес санат бойынша таңдап алды. Олар көпбалалы аналар, асыраушысынан айрылғандар, отбасында мүгедек баласы барлар, төртінші санатқа 18 жасқа дейін әке-шешесінен айрылған азаматтар енді. Ал соңғы топ атаулы әлеуметтік көмек алатындар. Бұл тізімдегілерге екі-ақ талап қойылады. Біріншісі, олардың несие көлемі 3 млн теңгеден аспауы қажет және келісімшарт осы жылдың 1 маусым айына дейін бекіген болуы шарт! Науқан жыл соңына дейін жалғасады.
МАҚСАТ ХАЛЫҚ, ЭКОНОМИСТ:
“Мемлекет бір реттік көмек жасады. Демек , осымен бітті. Халықта масылдық ой болып қалмау керек. Несиемді бір рет жауып берді, тағы да жауап береді екен деп. Өкінішке қарай бізде сондай әдет бар. Несие ала берейін, мемлекет жауып береді ғой деген ой қалыптасады. Бұл өте қауіпті дүние”.
Экономист сөзінің жаны бар. Қазір несиесін мемлекет жауып берген азаматтар қайтадан банктерден қарызға телефон, басқа да тұрмыстық заттар алып жатыр деген сыбыс кезіп жүр ел ішінде. Қоғамның пікірі әр қилы.
-Несиесі жабылған көп балалы аналар, қайтадан кредит алып жатыр екен. Біреуі телефон алып, бірі ноутбук алып, қалай ойлайсыз?
-Онысы дұрыс емес сияқты. Үкімет бір рет көмек берді ғой. Екінші рет қалай бере береді.
“Адамның бәрі жақсы өмір сүргісі келеді. Бірақ бәрінің бірдей оған қаржылық жағдайы көтермейді, амал жоқ несие алады”.
“ Соған үйреніп кеткен. Біздің қазақта сондай бар. Егер біреуге жақсылық жасасаң соны жасай беру керек. Өздерінің міндетін біреуге артып қойғанды жақсы көреді”.
“Кезінде кешірілді ғой қаншама трлн-ға. Халыққа берген жоқ ол ақшаны, керісінше банктерге берді. Одан қайтадан алды, тағы да берді банкке. Енді халыққа кешіріп жатыр. бастапқы кезде кредит беренде қайтпады ғой, одан соң басқа саясат жүргізу керек еді. кәсіпкерлікті дамыту”.
“Экономикадан хабары бар кейбір депутаттар дабыл қағып жатыр. Несиені кешіру бойынша тиісті заң қабылдау керек. Бюджеттен өтей бермей, банктердің өз жауапкершілігіне берген дұрыс дейді. Сонда халық та ойлана бастайды”.
ДӘНИЯ ЕСПАЕВА, ҚР ПАРЛАМЕНТІ МӘЖІЛІСІНІҢ ДЕПУТАТЫ:
“Меніңше, сондай заң керек. Ол кезде бюджеттен емес, қаржы институттары ақша бергенде олар өзінің пенясын, төлей алмаған азаматтардың ақшасын бюджеттен емес, қаржы институты өзі жабатын болады.
Мемлекеттің мұндай шарапатына 500 мыңнан аса қазақстандық іліккен. Ұлттық банктің есебінше, Президенттің Жарлығы шыққалы бері банкке қарызы бар жандардың 52 пайызының берешегі жабылыпты. Яғни, 236 мың тұрғынның. Ал олардың ішінде кімдер бар? Бәрі де мұқтаж жандар ма? Себебі, жалғызбасты әрі көпбалалы ақтөбелік ана банк пен халыққа қызмет көрсету орталығының табалдырығын тоздырған. Екеуі екі түрлі ақпарат беріп шаршатыпты.
ИНДИРА ЖҰМАҒАЛИЕВА, ЖАЛҒЫЗБАСТЫ АНА:
“Еңгезердей азаматтардың шамалы мөлшердегі 90-100 теңгелік несиелерін төлеп тастаған күлкім келеді. Мен әкенің де, ананың да орнында жүрмін, менікін неге не істемейді деген ой келді.
Дәл осы сұрақты әлеуметтік саланы басқарған, осы бастамалардың басы-қасында жүрген, қазір Премьер-министрдің орынбасары Бердібек Сапарбаевтан да сұрадық.
БЕРДІБЕК САПАРБАЕВ,ҚР ПРЕМЬЕР-МИНИСТРІНІҢ ОРЫНБАСАРЫ:
“Оның барлығы қарастырылған. Енді бір-екі адамға түспей жатса оны «Азаматтарға арналған үкімет» корпорациясына, министрлікке хабарласу керек. Олар қосымша мәлімет береді”.
Вице-премьер айтқандай, қазір осы несиені кешіру мәселелері бойынша бірыңғай байланыс орталығы іске қосылған. 111 нөміріне хабарласып, банкке қарызыңыздың өтелуі жөнінде кеңес алуға болады екен. Бірақ тұрғындардан шағым көп. Хабарласу мүмкін емес дейді. Бізде бірнеше рет қоңырау шалдық, шынымен де абонент бос емес.