«13 наурыз күнгі сағат 20-дағы жағдаймен жалынның биіктігі 30 метрді, диаметрі 35-40 метрді құрауда. Бұрғылау қондырғыларын жанып жатқан ұңғының маңынан алып кету жұмыстары жүргізілуде. Сонымен бірге Сарыбұлақ кенішінде осы тектес ұңғыда тазарту жұмыстары мен отты ауыздықтаудан кейін апат шыққан ұңғыны одан әрі жабу үшін қиыстыру жұмыстары жүргізілуде. Төтенше жағдайдың салдарын жоюға ҚР ТЖМ «Ақберен» РМК-ның 14 адамы мен 14 арнаулы техникасы жұмылдырылды», — деп хабарлайды ТЖМ.
Бұдан бұрын да хабарлағанымыздай, Қызылорда облысындағы Кеңлік кенішінде 9 наурызда 2 сағат 30 минутта газ қоспасы бар мұнай атқылап, артынан ол тұтанып кетті.
Бұрғылау жұмыстарын «Сырдария Мұнай» АҚ жүргізіп жатқан, ұңғының жобалық тереңдігі 1550 метрді, забой тереңдігі 1507 метрді құрайды. Құрбан болғандар мен зардап шеккен ешкім жоқ.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті