Caravan.kz медиа порталының тілшісі түсіндіреді.
Оқи отырыңыз: «Қаланы қаптаған самокат маусымы басталды»: Қазіргі жастардың жауапкершілігі неге төмен?
Ішкі істер министрлігі жол қозғалысы ережелері мен көлік құралдарын пайдалануға беру қағидаларына енгізген ауқымды өзгерістерді мынау сілтеме арқылы оқи аласыздар.
Самокаттың еркін дәуірі аяқталды
1 шілдеден бастап электросамокаттарды жалға беру мен пайдалану тәртібіне қатысты жаңа талаптар күшіне енеді. Сонымен қатар самокат мінушілерге арналған ережелер де қатаңдатылады.
Электросамокатты жалға беретін заңды тұлғалар мен жеке кәсіпкерлер:
- самокаттардың техникалық жағдайын тұрақты түрде тексеріп, ақауы бар құралдарды пайдаланудан шығаруға;
- көлікті тек 18 жасқа толған және жүргізуші куәлігі бар азаматтарға ғана беруге;
- клиенттерге айыппұлдар мен ереже бұзудың салдары туралы алдын ала ақпарат беруге;
- орнатылған технологиялар арқылы қозғалыс жылдамдығы мен маршрутты бақылап, мәліметтерді уәкілетті органдарға жолдауға;
- заңда көрсетілген аймақтарда жылдамдықты автоматты түрде төмендетуге;
- самокаттарды жаяу жүргіншілер мен көліктердің қозғалысына кедергі келтіретін жерлерде қалдыруға жол бермеуге;
- міндетті азаматтық-құқықтық жауапкершілік сақтандыруын рәсімдеп, әр самокатқа тіркеу нөмірін беруге;
- мемлекеттік органдар бекіткен талаптарға сәйкес барлық самокат паркін есепке алып отыруға міндеттеледі.
Самокат мінушілер үшін қандай өзгерістер болады?
Ең алдымен веложолдар мен арнайы велосипед жолағы пайдаланылуы тиіс. Егер ондай инфрақұрылым болмаса, самокатпен жолдың оң жақ шетімен (оның ішінде қоғамдық көлікке арналған жолақпен), жол жиегімен немесе тротуармен жүруге рұқсат етіледі.
Тротуарлар мен жаяу жүргіншілер жолымен жүруге тыйым салынады. Тек «ортақ қозғалыс аймағы» белгіленген арнайы көшелерде ғана жүруге болады.
Мұндай аймақтарда қозғалыс жылдамдығы сағатына 6 шақырымнан аспауы тиіс. Бұл жаяу адамның қалыпты жүріс жылдамдығына тең көрсеткіш. Сонымен қатар жаяу жүргіншілерге кедергі келтіруге болмайды, басымдық жаяу жүргіншілерге беріледі.
Самокатты жалға алу үшін міндетті түрде жүргізуші куәлігі болуы және азамат 18 жасқа толуы қажет. Кәмелетке толмаған азаматтарға самокатты жалға беруге тыйым салынады.
Егер жасөспірім ата-анасының аккаунтын пайдаланып самокатты жалға алса, жауапкершілік ересектерге жүктеледі.
Сонымен қатар велосипедтер мен қуаты төмен электрскутерлерге тротуармен жүруге бұрынғыдай рұқсат.
Сары және қызғылт сары маяктарға жаңа өкілеттік берілді
Енді қызғылт сары және сары түсті жарқылдауық шамдарды пайдалануға құқылы қызметтердің тізімі кеңейтілді. Олардың қатарына инкассаторлар, әкімдіктің паркон қызметі, салық органдарының мобильді топтары, сондай-ақ балалар мен велосипедшілерді алып жүретін көліктер енгізілді.
Оларға не рұқсат етіледі?
Сары маягы бар көлік жүргізушілеріне қауіпсіздік талаптарын сақтай отырып, жол таңбалары мен кейбір жол белгілерінің талаптарынан ауытқуға ресми түрде рұқсат берілді.
Басқа жүргізушілерге қойылатын талап
Енді қарапайым жүргізушілерге мұндай көліктердің қозғалысына кедергі жасауға тікелей тыйым салынады.
Арнайы жолақтарға қатысты талап күшейтілді
Қоғамдық көлікке арналған арнайы жолақтарда жүру ережесі нақтыланды. Бұдан былай бұл жолақтармен тек классикалық қалалық маршруттық көліктер мен салмағы 5 тоннадан асатын М3 санатындағы үлкен автобустар ғана қозғала алады.
Жаяу жүргіншілерге арнайы көлік алдында жолға шығуға тыйым салынады
Жол ережесіне енгізілген жаңа нормаға сәйкес, егер жедел жәрдем, өрт сөндіру қызметі немесе полиция арнайы дыбыс сигналы мен жарқылдауық шамдарын қосып келе жатса, жаяу жүргіншілерге жолды кесіп өтуге қатаң тыйым салынады.
Ал жолдан өтіп бара жатқан азаматтар дереу жолдың жүру бөлігін босатуы тиіс.
Бейнебақылау камераларына қатысты өзгеріс
Жол қозғалысы ережелерінен 5.42 «Фотовидеофиксация» белгісін міндетті түрде орнату талабы алынып тасталады.
Бұрын қалай болған?
Жүргізушілер «Сергек» камераларының алдында арнайы белгі болмағанын алға тартып, айыппұлдарды сот арқылы жиі даулауға тырысатын.
Енді қалай болады?
Егер құқықбұзушылықты стационарлық сертификатталған камера тіркесе, «Фотовидеофиксация» белгісінің болуы міндетті саналмайды. Мұндай жағдайда салынған айыппұл заңды деп танылады.
Полицей мен жүргізуші арасындағы тәртіп өзгереді
Көлікті тоқтату регламентіне де бірқатар өзгеріс енгізіледі.
Полиция қызметкері жүргізушіге кідіріссіз келіп, көлікті тоқтату себебін бірден түсіндіруге міндетті.
Инспектор қызметтік куәлігін өз қолында ұстап көрсетеді. Оны жүргізушінің қолына беру міндетті емес.
Маңызды өзгеріс
Егер жүргізуші автоматтандырылған жүйе арқылы тіркелген құқықбұзушылық үшін тоқтатылса (мысалы, тасымалды радар немесе «Қорғау» жүйесі арқылы), полицей құқықбұзушылықты растайтын материалдарды жүргізушіге көрсетуге міндетті.
Ауыр жол апатынан кейін міндетті техникалық тексеріс енгізіледі
Егер көлік жол-көлік оқиғасы кезінде ауыр зақым алып, оны пайдалануға тыйым салынатын деңгейде бүлінсе, ол міндетті түрде қайта техникалық тексеруден өтеді.
Мұндай тексеруге жолдаманы жол апатын рәсімдейтін полиция қызметкерлері береді.
Осы уақытқа дейін техникалық тексерудің мемлекеттік базасы толықтай цифрлық форматқа көшіріледі.