"Vertex" ААҚ Маңғыстау облысындағы "Астрахань карьері" кенішін таяу уақыттарда игере бастамақшы

Еліміздегі мұнай өндіруші компанияларға кең көлемді қызмет түрлерін ұсынатын Қазақстандық жетекші компаниялар тобы - "Алвер холдинг" ЖШС-нің құрамындағы "Vertex" ААҚ Маңғыстау облысындағы "Астрахань карьері" әктас кенішін таяу уақыттарда игере бастауды көздеп отыр. Бұл туралы KZ-today тілшісіне "Алвер холдинг" ЖШС-нің директоры Жомарт Момынбаев хабарлады.

Оның айтуынша, аталмыш кеніш Маңғыстау облысындағы азаматтық және өнеркәсіптік құрылыс саласына арнап қабырғалық материалдар мен қаптама тастың шикізат базасын құру үшін 1980-жылы барланған. "Маңғыстау облыстық жер қойнауын пайдалану және оны қорғау жөніндегі мемлекеттік инспекциядан" берген анықтамаға сәйкес, кеніштегі В+С1 категориялы пайдалы қазба қоры 7 млн. текше метрді құрайды. Ж.Момынбаевтың айтуынша, кенішті игеру нәтижесінде алынатын дайын өнім Форт-Шевченко мен Баутино ауылындағы мұнай кеніштері мен жергілікті өнеркәсіптік нысандарды жайластыруға бағытталған құрылыс жұмыстарына пайдаланылады. "Астрахань карьері" әктас кеніші Форт-Шевченко қаласынан солтүстік-шығысқа қарай 2 шақырымда, Каспий теңізінен 3,2 шақырымда орналасқан. Компания еліміздің мұнайгаз секторына қызмет көрсету үшін 1995-жылы құрылған.

Әріптестер жаңалығы

Пікір қалдырыңыз