Жер сілкінісінен зардап шеккен Т.Рысқұлов атындағы аудандағы тұрғын үйлерді қалпына келтіру жұмыстары 15-қарашаға дейін аяқталады

Ал үкімет басшысының бірінші орынбасары Александр Павловтың ақпаратына жүгінсек, қазіргі таңда мемлекеттік комиссияға 7502 үйдің 449-ы тапсырылған жоқ, соның ішінде 50 үйді күрделі жөндеу, 400-ге жуық үйдің құрылысын салу жұмыстары аяқталмай отыр. А.Павлов нысандарды қалпына келтіру жұмыстарының айрықша қарқынды жүргізіліп жатқанын, жұмыс ауқымының үлкендігін атап көрсетті. "Жұмыстар жоғарғы деңгейде ұйымдастырылуда",- деді үкімет басшысының бірінші орынбасары. "Бір нысанды қалпына келтіру жұмысына 20 мыңнан астам құрылысшы жұмылдырылғандықтан, жалпы ауданды қалпына келтіру - еліміз тарихында "бұрын-соңды болмаған" қауырт құбылыс болды",- деп атап көрсетті. А.Павловтың айтуынша, республикалық, аймақтық және ұлттық компаниялардың бюджетін қоса есептегенде, зілзаладан зардап шеккен ауданды қалпына келтіруге бағытталған жалпы біріккен бюджет 15,2 млрд. теңгені құрайды.