Астана қаласының спортшылары теміртаулық («Металлург АМТ») және алматылық құрбыларын 3:0 есебімен жеңді. Қарағанды облысының «Қарағанды» командасы болса кеше өскемендіктерді («Шығыс-ҚорғасынҚұрылыс»), арғы күні теміртаулықтарды дәл осындай есеппен тізе бүктірген еді. Ал 2010/2011 жылдардағы маусымда ел чемпионатының күміс жүлдегері атанған Павлодар облысының «Ертіс-Қазхромы» алғашқы ойынында өскемендіктерден 3 ұпай олжалағанмен, кеше ел чемпионы саналатын Алматы облысының «Жетісуына» 1:3 есебімен есе жіберді. Бүгін енді «Алматы» мен «Металлург АМТ», «Қарағанды» мен «Жетісу», «Астана» мен «Шығыс-ҚорғасынҚұрылыс» шеберлік байқасады. Ал жұпсыз қалған павлодарлықтар енді биылғы чемпионатта 3-4 орынға ие болған «Астана» мен «Қарағанды» командалармен болатын келесі ойындарға дайындығын тағы пысықтай түспек. Өйткені олар ендігі 4 кездесуде қарсыластарына өз басымдығын мойындата алса, турнир кестесінде 2-орынға көтерілуге әлі де мүмкіндігі бар.
