«Кармен» — дүниежүзілік сахна төрінен опера, мюзикл, балет ретінде талай рет тамашаланған. «Карменсита» (Проспер Мерименің «Кармен» повесіне фантазия, авторы және режиссері — Т.Теменов) қойылымы драма күйінде алғаш рет сахналанбақ. «Карменсита» — махаббат пен ғашықтық, сұлулық пен іңкәрлік сезімдер жайында сыр шертетін, сүйгеніне жету жолында күресу, өшпенділік пен озбырлық жайында сөз етер, тартысқа толы туынды. «Кармен» шығармасының бас кейіпкері — испандық жас сыған қызы. Кармен өзінің сымбатты келбеті, бойдағы жалын атқан жастық қуаты, жасампаз сұлулығы және тартымды тәкаппарлығы арқылы елдің бәрін өзіне ынтық етеді.
Шығарманың басты кейіпкерінің өне-бойы ай жарықта жымыңдаған жұлдыздар сынды жарық, ашық аспан астындағы айдын көлдің тұнығындай мөлдір, айнала біткен табиғаттың көркем келбетіндей жарқын. Кармен — туынды желісінде асқан сұлулығымен қатар, тағылымсыз, екіұдай жасампаз қылықтарымен де бейнеленеді. Әйтсе де, оның ерекше болмысы — айналасына махаббат сыйлаған ару кейпінде көрініс табады.
