Мерейтой иесін облыс әкімі Нұрлан Ноғаев құттықтап, Қ.Бердіғалиевтің Мұхит пен Ғарифолланың ән дәстүрін жалғастырушы бірегей тұлға екендігін атап өтті. Ол өзіне тән орындаушылығымен, айтыскерлік өнерімен ел мәртебесін асырып қана қоймай, өнерді алға апарар көптеген шәкірттер тәрбиеледі. Қатимолла Бердіғалиев «Қазақтың мың әніне» он ән жаздырса, оның орындауында 78 туынды мәңгілік таспада қалды.
Қ.Бердіғалиевтің кешіне Түркістаннан Қазақстан халық әртісі Қажыбек Бекбосын, Алматыдан Қазақстанның еңбек сіңірген әртісі Майра Ілиясова, әнші-композиторлар, Қазақстанның еңбек сіңірген қайраткері Донеділ Қажымов, Қазақстанның еңбек сіңірген әртісі Гүлнәр Дәукенова, домбырашы, мәдениет қайраткері Мақсат Тілепбергенов, әнші Мейрамгүл Орашева және еліміздің басқа өңірлерінен де өнерпаздар келіп, өз өнерлерін көрсетті.
Қатимолла Бердіғалиевпен бірге сахна төріне шәкірттері де көтеріліп, ән шырқады.
