Жылу беру маусымының басталуына бір айдан аз уақыт қалса да, кейбір өңірлер дайын емес болып шықты, деп хабарлайды Caravan.kz медиа порталы.
Бірқатар өңірлерде ЖЭО-дағы жөндеу жұмыстары созылып кеткені анықталды. Мысалы, Степногорск қаласында резервтік қазандық әлі күнге дейін қалпына келтірілмеген. Ал Ақтауда түрлі себептерге байланысты турбиналар мен жылу желілерін жөндеу жұмыстары кешіктірілуде. Мұндай мәселелер іс жүзінде әр өңірде кездеседі.
Премьер-Министр әкімдердің жұмысын сынға алды. Оның айтуынша, бұл жағдай әлсіз жоспарлау мен әкімдер тарапынан тиісті бақылаудың жоқтығын көрсетеді. Осыған байланысты Үкімет басшысы 1 қыркүйекке дейін өңірлерге әлеуметтік мазут жеткізу кестесін бекітуді, мектептер мен балабақшаларды қысқа дайындауды тапсырды. Сондай-ақ, 15 қазанға дейін ауруханалар, коммуналдық шаруашылық нысандары мен тұрғын үй қорын толық дайындауды тапсырды.
Қазақстанда қысқа дайындыққа шамамен 177 млрд теңге бөлінген. Бұл қаражат жылу желілерін жөндеуге және қайта жаңғыртуға, жаңа жылу көздерін салуға және апаттық резерв қалыптастыруға бағытталған. Энергетика министрлігінің мәліметінше, қазіргі уақытта қажетті жұмыстардың тек үштен екі бөлігі ғана аяқталған. Министр әкімдіктерге жұмысты жеделдету қажеттігін атап өтті.
Сонымен қатар, Алматыдағы ЖЭО-2 келесі жылы газға көшірілетіні белгілі болды. Жобаны желтоқсан айында аяқтау жоспарланған, қазіргі уақытта қажетті жабдықтың бір бөлігі ғана жеткізілген. Биыл станцияда қазандық пен су қыздыру бөліктері аяқталады. Аталмыш жұмыстармен бірге Алматыда ЖЭО-3 жаңғыртылып жатыр, оны да келесі жылдың соңында пайдалануға беру көзделуде.
