Бұл туралы Caravan.kz медиа порталы хабарлайды.
Матчтан кейінгі баспасөз мәслихатында алматылық команданың бас бапкері Рафаэль Уразбахтин шәкірттерінің Чемпиондар лигасында жүріп өткен жолына баға берді.
“Біздің футбол ертегіміз аяқталды. Біз алған баға жетпес тәжірибеге өте қуаныштымыз. Топ-командалармен ойнадық және сол үздік клубтарды Қазақстанға алып келдік. Біз үшін ең басты жеңіс — осы. Мүмкін, дәл осы арқылы Қазақстанда футболға деген қызығушылық артқан шығар. Жанкүйерлер қатары көбейді. Менің ойымша, біздің Чемпиондар лигасында ойнағанымыз елдегі футболды дамыту бағытындағы қозғалысты жылдамдатуға ықпал етеді”, — деді Уразбахтин.
“Арсеналмен” өткен матч туралы сөз қозғаған бас бапкер қарсыластың жоғары деңгейін және өз ойыншыларының жанқиярлықпен ойнағанын ерекше атап өтті.
“Біз топ-командамен ойнадық, бұл біз үшін баға жетпес тәжірибе. Жігіттер жарады, оларға жанқиярлығы мен сапалы ойын көрсеткені үшін алғыс айттық. Матчтың алғашқы минуттарында сәл түсініспеушілік болды. Мүмкін, қобалжу әсер еткен шығар. Біз ортаны жабуға және тік бағыттағы пас беруге мүмкіндік бермеуге келіскен едік. Алайда үшінші минутта қателік жіберіп, жылдам гол өткізіп алдық”, — деді ол.
Сөз соңында Уразбахтин команданың Лондонда маңызды сынақтан лайықты өткенін айтты.
“Біз үшін бұл емтиханнан, топ-клубпен матчтан өту маңызды болды. Мен жігіттер алаңда бар күшін салады деген едім, және олар соны орындады деп есептеймін. Бұл ойынды абыроймен өткіздік”, — деп түйіндеді бас бапкер.
Еске сала кетейік, “Қайрат” Лондонның “Арсеналына” 3:2 есебімен жол беріп, Чемпиондар лигасындағы өнерін аяқтады.