Үкіметтің мәліметінше, Алматы тау кластерін дамыту 73 іс-шараны қамтиды, оның ішінде 49-ы ағымдағы жылы жүзеге асырылуы керек, деп хабарлайды Caravan.kz медиа порталы.
Жоба бірнеше кезеңге бөлінген:
Бірінші кезең: Шымбұлақты жаңғырту және Бұтақты пен Кіші Алматы (Кімасар) шатқалдарын дамыту.
Екінші кезең (2027 жылдан бастап) «Пионер» және Oi-Qaragai курорттарын дамыту, олар өзара аспалы жолдар арқылы байланыстырылатын болады.
Шымбұлақты жаңғырту аясында мамыр айында жеті аспалы жолдың біріншісінің құрылысы басталады. Жыл соңына дейін екі жаңа желіні аяқтау жоспарланған. Сонымен қатар, тау шаңғысы трассаларының жалпы ұзындығы қазіргі 18 шақырымнан тағы 5 шақырымға ұлғайтылмақ.
Almaty Superski жобасы аясында 2026 жылы 8 көпір мен су өткізу құрылыстарын салу көзделген. Бұдан бөлек, маусым айында ұзындығы 6 шақырым болатын автожол құрылысы басталады. Инженерлік инфрақұрылым мен жол құрылысы 2027 жылдың қыркүйегіне дейін аяқталуы тиіс. Сондай-ақ негізгі курорттарды байланыстыратын бірыңғай аспалы жол «вокзалы» көлік торабы қалыптастырылады.
Almaty Superski жобасы Көк-Жайлау шатқалында толыққанды тау инфрақұрылымын құруды көздейді. Оның құрамына хайкинг бағыттарының желісі, визит-орталықтар, цифрлық навигация, төтенше байланыс жүйесі және маршруттарды белгілеу кіреді.
Айта кетейік, Көк-Жайлау шатқалында жоспарланған тау-шаңғы курорты жобасы бойынша қоғамдық тыңдаулар 26 мамыр күні сағат 09:00-де оқушылар сарайында өтеді. Оны Kazakh Tourism Development Ltd. компаниясы ұйымдастырмақ. Тыңдауларда курорт құрылысының қоршаған ортаға ықтимал әсері жөніндегі есеп талқыланады.
Оқи отырыңыз: «Көк-Жайлау» курортының құрылысына қызу дайындық басталып кетті: Жоба туралы не белгілі?
Алматы облысында 2025–2029 жылдарға арналған Алматы тау кластерін дамыту жоспары аясында жалпы сомасы 92,8 млрд теңгені құрайтын 15 іс-шара қарастырылған. Оның 83,8 млрд теңгесі жеке инвестициялар. Oi-Qaragai курортында бірқатар жобалар іске асырылып үлгерді: 10 орындық гондолалық және 6 орындық креслолық аспалы жолдар пайдалануға берілді, тау шаңғысы трассаларының алғашқы кезектері салынды, параглайдингке арналған алаң және ілеспе инфрақұрылым құрылды.
2027 жылдың үшінші тоқсанында курортты қосымша электрмен жабдықтау жобасын аяқтау жоспарланып отыр. Сонымен қатар, «Тау–Тұран–Байбұлақ» автожолына күрделі жөндеу жүргізу көзделген.
Туризм және спорт министрлігінің бағалауынша, аталған шаралардың нәтижесінде туристер ағыны жылына 2 миллионнан 5 миллион адамға дейін артуы мүмкін. Жобалар мыңдаған жұмыс орнын ашып, инвестициялар тартуға ықпал етеді деп күтілуде.
Алайда премьер-министрдің айтуынша, мемлекеттік органдар мен мердігерлер тарапынан жұмыс қарқынының төмен болуы салдарынан жобаларды жүзеге асыру кешігіп жатыр. Осыған байланысты Олжас Бектенов кеңеске қатысушыларға бірқатар тапсырма жүктеді:
- мемлекеттік сараптамадан өтуді жеделдету;
- уақытша инфрақұрылымды қамтамасыз ету;
- жер телімдерін бөлу және келісу мәселелерін жедел шешу.