Өнер кешінде «Нарын» халық аспаптар оркестрі Құрманғазының бірнеше күйлерін тамылжыта орындады. Сондай-ақ, домбырашы Александра Киселева «Балбырауын», Азамат Сатыбалдиев «Желкем қатпай», Шарипа Жәменова «Айда бұлбұл Айжан-ай», Өнербек Жанбала «Арба соққан», Айгүл Батырқайырова «Жігер» күйін тартқанда жұртшылық олардың өнерлеріне тәнті болды.
— 1958 жылы белгілі композитор, қазақ музыка зерттеушісі Ахмет Жұбановқа Құрманғазы Сағырбайұлының ұмыт болған «Байжұма», «Айда бұлбұл Айжан-ай», «Арба соққан» күйлерін исатайлық күйші Ғилман Қайрошев тарту еткен. Әкем — Ғилман бұл күйді Құрманғазы Сағырбайұлының көзін көрген күйші әкесі Ерғали Қайрошевтен естіген, — деді кеш барысында сирек орындалып жүрген кейбір күйдің тарихына тоқталған Сәуле Ғилманқызы.
