«Аппеляцияға шағымданамыз. Дәлелдер дұрыс бағамдалған жоқ. Іс материалдары оның кінәсінің дәлелденбегенін көрсетіп тұр. Бөлдешевтің іс-әрекетінде қылмыстық құрам жоқ. Бірақ бұл назарға алынған жоқ», — деді Б.Биділдаев бейсенбі күнгі сот процесінен кейін журналистерге.
А.Бөлдешевтің зайыбы – Гүлмира да үкіммен және істі тергеу барысымен келіспейтінін жеткізді.
«Сіздерден көп нәрсені жасырды. Мен баспасөз мәслихатын өткізіп, бәрін де айтып беремін. (…) Мен мүлдем келіспеймін», — деді ол.
Бейсенбі күні Астананың әскери соты авиация генерал-майоры Асқар Бөлдешевті 8 жыл 6 айға бас бостандығынан айыру туралы шешім шығарған болатын. Сонымен қатар, сот президентке оны «авиация генерал-майоры» атағы мен мемлекеттік наградалардан айыру туралы ұсыныс жасауды қарар етті. Ал, А.Бөлдешевтің сыбайласы — RG ЖШС директоры Талғат Жұмаханов алты жылға сотталды. Сондай-ақ, сот А.Бөлдешев пен Т.Жұмахановтан 114 млн 508 мың 350 теңге өндіріп алу туралы қаулы етті.