Оқыс оқиға Бейнеу ауданында болған. Камаз автокөлігінің жүргізушісі көлік тізгініне ие бола алмай, жолдың қарсы бағытына шығып кеткен. Сөйтіп, шекарашылар мінген Уаз автокөлігіне соқтығысады. Сол кезде Уаздың ішінде 4 шекара қызметкері мен 2 бала болған. Бұлар – сол сарбаздардың балалары. Қаза тапқандардың бірі –18 жастағы көлік жүргізушісі, екіншісі – 6 жасар бүлдіршін. Бұлардың өліміне себепші болған Камаздың жүргізушісі дін аман. Ал апат кезінде зардап шеккен тағы 3 әскери қызметкер санитарлық авиациямен Ақтауға жеткізілді. 12 жастағы жеткіншек балалар ауруханасына жіберілді. Шекарашылардың біреуі жансақтау бөлімінде жатыр.
Медет Жиғанғалиев, Маңғыстау облыстық ауруханасының бөлім меңгерушісі:
-Оған ота жасау жоспарда бар. Сүйегіне жасалынады. Жамбас сүйегіне. Жағдайы тұрақты. Аппараттан алдық. Қазір өзі демалып жатыр.