Бұл туралы Caravan.kz медиа порталы zakon.kz-ке сілтеме жасап хабарлайды.
Тиісті ұсынымдарды 2026 жылғы 17 маусымда Бірыңғай жинақтаушы зейнетақы қорының (БЖЗҚ) баспасөз қызметі жариялады.
Мамандардың айтуынша, жинақтаушы зейнетақы жүйесіне кезең-кезеңімен көшу жағдайында болашақ зейнетақының мөлшері азаматтардың жинаған қаражатына тікелей байланысты болады. Сондықтан әр адам өз зейнетақы жинақтарын қалыптастыруға белсенді қатысуы қажет.
Зейнетақы жинақтарының өсуін қамтамасыз ету үшін БЖЗҚ мынадай кеңестер береді:
- Зейнетақы жарналарының тұрақты әрі толық түсуін бақылау. Мұны БЖЗҚ сайтындағы жеке кабинет немесе мобильді қосымша арқылы тәулік бойы тексеруге болады.
- Инвестициялық басқару мүмкіндіктерін пайдалану. Салымшылар міндетті зейнетақы жарналары есебінен жиналған қаражаттың 50 пайызына дейінгі бөлігін, ал ерікті жарналар бойынша жинақтардың 100 пайызын өз таңдауы бойынша жеке инвестициялық басқарушы компаниялардың басқаруына бере алады. Инвестициялық стратегияны тәуекел деңгейіне, күтілетін табысқа және инвестиция мерзіміне қарай таңдауға мүмкіндік бар.
- Мүмкіндік болған жағдайда ерікті зейнетақы жарналарын төлеу. Ерікті жарналарды өз шотыңызға ғана емес, жақындарыңыздың, соның ішінде кәмелетке толмаған балаларыңыздың атына да аударуға болады. Алғашқы жарна түскеннен кейін БЖЗҚ мұндай шотты автоматты түрде ашады.
Сонымен қатар жұмыс берушілер де қызметкерлері үшін ерікті зейнетақы жарналарын төлеп, оны әлеуметтік пакет құрамына енгізе алады.
Ерікті зейнетақы жарналарына қатысты салықтық жеңілдіктер қарастырылған. Мәселен, жұмыс беруші төлеген мұндай жарналар қызметкердің табысы болып саналмайды және одан жеке табыс салығы ұсталымайды. Ал жұмыс беруші бұл шығындарды салықтық шегерімге жатқыза алады.
Ерікті жарналар есебінен жиналған қаражаттан салымшылар 50 жастан бастап, яғни зейнет жасына жеткенге дейін төлем ала алады.
Болашақ зейнетақыны алдын ала жоспарлау.
БЖЗҚ ұсынатын зейнетақы калькуляторы мен жеке зейнетақы жоспары қызметтері арқылы болашақ төлемдердің мөлшерін есептеп, жинақ көлемін реттеуге болады. Бұл сервистер қордың ресми сайтында және мобильді қосымшасында қолжетімді.
Еске салайық, бұған дейін БЖЗҚ зейнетақы жинақтарын пайдалануға арналған жеткіліктілік шектерінің өзгеруінен кейін алаяқтардың белсенділігі артқанын ескерткен болатын.
Сондай-ақ 2026 жылғы 6 маусымда БЖЗҚ зейнетақы жинақтарын мерзімінен бұрын пайдалану үшін жаңа ең төменгі жеткіліктілік шектерін жариялады. Нәтижесінде азаматтардың алуға болатын жинақ көлемі азайды. Ал бұл өзгерістердің себептерін Еңбек және халықты әлеуметтік қорғау министрі Асқарбек Ертаев түсіндірген еді.
