Астанада «тоқал ісі» бойынша ұсталған қашқынды полицейлердің өзі әзер таныған

Атышулы тоқал ісіне қатысты қашқында жүрген үшінші күдікті ұсталды. Танымал кәсіпкер Қайрат Жамалиевтің жандайшабы алысқа ұзамаған екен.Түр-әлпетін өзгертіп, сақалын қырып, салмағын азайтып көзілдірік киіп алған. Халықаралық іздеу жариялап 2 ай бойы талмай іздеген тәртіп сақшылары оған Астанада қыдырып жүрген сәтінде қолына кісен салды.

Полиция таратқан жалғыз суретте, күдікті ешкім танымасыүшін бірыңғай қара түсті киім киіп алған. 35 жастағы Арман Әбілтаевты «Арлан» жасағының сарбаздары түнде далада ұстапты. Осыған қарағанда, түнделетіп жасырын пәтеріне келе жатқан болуы керек. Кезінде күші тасығанымен қазір жуасып қалған Әбілтаев бірден бастығы Жамалиев отырған изоляторға қамалды. Енді ерке тоқал үшін 24 жастағы Әліби Жұмағұловты жабылып ұрған үшеу сот алдында бірге жауап беретін болады. Жамалиев пен оның жүргізушісі Анатолий Прибытковқа қатысты процесс жабық жағдайда өтіп жатыр.

</br>