Оны абайлап қана ұстау керек, құшақтауға болмайды. Денесіне қол тигізудің өзі қиямет-қайым. Сәбиіне деген аналық мейірімін Раиса Брагина тек жанарымен ғана білдіре алады. Себебі, жақында ғана дүние есігін ашқан қызы Кирияны өте сирек кездесетін ауру меңдеген. Бірақ, нақты қандай сырқат – оны ешкім білмейді.
Раиса Брагина, сәбидің анасы :
-Босанған кезімде қызымның қос білегі мен табандарында және бір тізесінде терісі болмай шықты. Қаскелең перзентханасындағы педиатр-дәрегерлер бірден сифилис деген диагноз қойды. Оны естіп үйде күйеуім екеуміз ұрыстық. Артынан «көбелек-бала» деген диагноз қойды. Бірақ, мен ана ретінде оған сенбеймін.
«Сифилис» дегенді естіген соң, күйеуі мен әйелі бір-бірінен көріп, үйдің іші ұрыс-керіске айналған. Алайда, Алматыдағы тері венерологиялық институтының мамандары аудандық дәрігерлер қойған диагнозды теріске шығарыпты.
Сәуле Сауранбаева, Қарасай аудандық орталық ауруханасының директоры:
— Жоқ, әрдайым да біз жауапты боламыз. Ал енді мына баланы, консультациялары бар, оның бәрін істеп берді. Содан кейін, тері аурулары институты өз қарамағына алды. Өйткені шынымен де өте сирек кездесетін жағдай.
Иә, өте сирек кездесетін жағдай. Халық арасында бұл ауру «көбелек синдромы» деп аталады. Яғни, сәбидің денесі өте нәзік. Қол тисе бітті, терісі қақ айрылады. Ылғи дәкемен оранып жүрмесе болмайды. Алайда, мамандар Раисаның қызы осы ауруға шалдыққан деп нақ айта алмай отыр. Дәрі-дәрмекпен де толық қамтамасыз етуге жергілікті аурухана қауқарсыз.
Сәуле Сауранбаева, Қарасай аудандық орталық ауруханасының директоры:
-Дәрі-дәрмектер ол біздің тегін берілетін дәрінің ішіне кірмейді. Енді дәрі-дәрмегін алып бере алмасақ та таңу жағынан дейміз ғой, ол жағынан көмек берейік.
Дегенмен, Раисаға бұл жеткіліксіз. Қазақстанда бесінші рет кездесіп отырған ауруды тек шетелде ғана емдеуге болады екен. Қазірдің өзінде ем-домға күн сайын 90 мың теңге жұмсап отыр. Кенже қызынан айрылғысы келмейтін Раисаға қазір кез келген көмек ауадай қажет.
Раисаның телефоны: 87073016193