Ақмола облысына қарасты Бурабай ауданының әкімдігі коммерциялық мақсаттағы көптеген жер телімдерін заңсыз таратқан. Аймақ прокурорлары осындай заңбұзушылықты анықтады. Соңғы 2-3 жылда курортты аумақта 47 жер телімі ешқандай аукционсыз және конкурссыз бизнес жүргізу мақсатында үлестірілген. Одан қалды, кәсіпкерлердің бизнес ашам деп 3 жыл мерзімге жалға алған 294 жер телімі уақтылы игерілмеген. Құзырлы органдардың араласуымен олардың 30-ы мемлекет иелігіне қайтарылды. Өткен жылы аудандық жер қатынастары бөлімі мен сәулет бөлімінің жетекшілері қызметтен қуылған болатын. Алайда заңбұзушылықтар әлі де тыйылмай тұр.
Арман Төлебаев, облыстық прокуратура басқармасының аға прокуроры:
— Коммерциялық мақсаттағы жер телімдерін жекеменшікке беру үшін әкімдіктер аукциондар мен конкурстар өткізуі тиіс. Алайда олар заңнаманың бұл талабын өрескел бұзып отыр. Осындай заңсыз жолмен үлестірілген 47 жер телімінің қазір 41-і мемлекет меншігіне қайтарылды. Қалғандары сотта қаралуда.