Қазақстан мен АҚШ бақылаусыз сәуле көздерін іздестіру бағдарламасын жүзеге асырады

Қазақстан мен АҚШ үкіметтері қараусыз қалған радиоактивті сәуле көздерін іздестіру бағдарламасының жобасын жасап жатыр. Бұл туралы бүгін, 20-мамырда Алматыда өткен брифингте АҚШ-тың ядролық қауіпсіздік жөніндегі ұлттық басқармасының сарапшысы Ричард Миэн мәлімдеді,- деп хабарлайды KZ-today тілшісі.

Бұдан бұрын да хабарлағанымыздай, АҚШ-тың ядролық қауіпсіздік жөніндегі Ұлттық басқармасы мен Сандий ұлттық зертханасының сарапшылары «Иондаушы сәуленің бақылаусыз көздерін іздестіріп, қауіпсіз жерге сақтау» тақырыбына арналған семинар-тренинг аясында еліміздің мамандарына дәріс оқыды. Еліміздегі ҚР Ұлттық ядролық орталығы, «МАЭК-Қазақстан» ЖШС, Үлбі металлургиялық зауыты сынды еліміздегі 5 ірі кәсіпорындар мен институттарда қызмет атқаратын 25 адам семинар-тренингіге қатысты. Тренинг барысында пайдаланылған жабдықтар радиоактивті көздермен жұмыс істейтін еліміздің кәсіпорындарына ақысыз таратып берілді.

Р.Миэннің айтуынша, қазақстандық физиктерді оқыту туралы бастаманы республика үкіметі көтерген.