Мәскеуде ТМД электрэнергетикалық кеңесінің кезекті отырысы басталды

Кездесуге Әзербайжан, Грузия, Армения, Беларусь, Қазақстан, Қырғызстан, Молдова, Ресей, Тәжікстан, Түрікменстан, Өзбекстан және Украинаның электр энергетикасын басқарушы органдарының бірінші басшылары — уәкілетті өкілдері қатысуда.

Баспасөз қызметінің хабарлауынша, жиналысқа қатысушылар ТМД елдерінің энергетикалық бірлестіктері арасындағы ынтымақтастықты дамытуға байланысты бірқатар мәселелерді талқылайды. Атап айтсақ, отырыстың күн тәртібінде ТМД энергетикалық жүйесінің 2004-2005-жылғы күз-қыс маусымындағы жұмысын қорытындылау, ТМД-ға қатысушы елдердің электр қуаты саласындағы 2020-жылға дейінгі ынтымақтастық және ықпалдастық стратегиясының жобасын талқылау межеленген.
ТМД электрэнергетикалық кеңесін 2000-жылдан бері РАО «ЕЭС Россия» компаниясының төрағасы Анатолий Чубайс басқарады.
ТМД электрэнергетикалық кеңесі электр энергетикасы саласында Достастық елдерінің мемлекетаралық қарым-қатынастарын үйлестіру туралы ТМД үкімет басшылары 1992-жылдың 14-ақпанында қол қойған келісімге сәйкес құрылған. Кеңестің басты мақсаты — біріккен электр энергетикасы жүйелерінің тиімді жұмыс істеуі негізінде мемлекеттерді электр қуатымен сенімді әрі тұрақты қамтамасыз ету бағытында өзара үйлесімді іс-шараларды жүзеге асыру болып табылады.
ТМД электрэнергетикалық кеңесіне Әзербайжан, Грузия, Армения, Беларусь, Қазақстан, Қырғызстан, Молдова, Ресей, Тәжікстан, Түрікменстан, Өзбекстан және Украинаның электр энергетикасын басқарушы органдарының бірінші басшылары енеді.